'ഞാന്‍ കൈവീശി ആരും ശ്രദ്ധിച്ചില്ല, അന്നത്തോടു കൂടി എന്റെ അഹങ്കാരം മാറി'; രജിനികാന്ത്

സൂപ്പര്‍സ്റ്റാര്‍ രജനീകാന്തിന് സിനിമപോലെ തന്നെ ഇഷ്ടമുള്ള ഒന്നാണ് ആത്മീയ ജീവിതവും. വര്‍ഷത്തിലൊരിക്കല്‍ അദ്ദേഹം ഹിമാലയ യാത്രയും നടത്താറുണ്ട്. ഇപ്പോഴിതാ തന്റെ ആത്മീയ യാത്രയില്‍ തന്റെ അഹങ്കാരത്തെ തകര്‍ത്തു കളഞ്ഞ ഒരനുഭവം പങ്കുവയ്ക്കുകയാണ് അദ്ദേഹം. ബംഗളൂരുവില്‍ ശ്രീ ശ്രീ രവിശങ്കര്‍ അതിഥിയായെത്തിയ ഒരു പരിപാടിയിലാണ് രസകരമായ സംഭവം രജനികാന്ത് പറഞ്ഞത്.

ശ്രീ ശ്രീ രവിശങ്കറിന്റെ 70-ാം ജന്മദിനാഘോഷങ്ങളുടെ ഭാഗമായാണ് പരിപാടി സംഘടിപ്പിച്ചത്. ആര്‍ട്ട് ഓഫ് ലിവിങ് ആശ്രമത്തിലെ ശാന്തമായ അന്തരീക്ഷം തനിക്ക് എത്ര മാത്രം ഇഷ്ടപ്പെട്ടിരുന്നുവെന്നും രജനികാന്ത് പിടിഐയോട് പങ്കുവെച്ചു.

'എനിക്ക് ഏറ്റവും ഇഷ്ടമുള്ള കാര്യമാണ് ഈ ആശ്രമത്തില്‍ താമസിക്കുന്നത്. അവിടെ പച്ചപ്പും തടാകങ്ങളും പശുക്കളടക്കം കുറേ മൃഗങ്ങളുമൊക്കെയുണ്ട്. മാത്രമല്ല, അവരെല്ലാവരും എപ്പോഴും പുഞ്ചിരിച്ചു കൊണ്ടിരിക്കുകയാണ്,' രജിനികാന്ത് പറഞ്ഞു. 'രണ്ട് ദിവസം അവിടെ താമസിക്കാനായിരുന്നു ഞാന്‍ ആദ്യം പ്ലാന്‍ ചെയ്തത്. പക്ഷേ, അവിടുത്തെ ശാന്തമായ അന്തരീക്ഷം കാരണം 15 ദിവസം ഞാനവിടെ തങ്ങി. ഹിമാലയം സന്ദര്‍ശിച്ചതിന് ശേഷം മറ്റെവിടെയും ലഭിക്കാത്തത്ര ആശ്വാസം ഈ സ്ഥലം എനിക്ക് നല്‍കിയെന്ന്' താരം പറഞ്ഞു.

അതേസമയം, തന്റെ അഹങ്കാരം ഇല്ലാതായ ഒരു സാഹചര്യത്തെ കുറിച്ചും അദ്ദേഹം പറഞ്ഞു. 'ഒരു ദര്‍ശനത്തിനായി ഗുരുദേവനോടൊപ്പം പോയ സാഹചര്യത്തിലായിരുന്നു അത്. എന്റെ അടുത്തേക്ക് ഒരുപാട് ആളുകള്‍ വരുമെന്ന് ഞാന്‍ കരുതി…സത്യം പറയാലോ, ഒരാള്‍ പോലും എന്നെ നോക്കിയില്ല. ഞാന്‍ കൈവീശി കാണിച്ചു, പക്ഷേ ആരും എന്നെ കണ്ടില്ല. ഞാന്‍ നിരവധി പരിപാടികളില്‍ പങ്കെടുത്തിട്ടുണ്ട്, പക്ഷേ ഇത് എന്റെ അഹങ്കാരത്തെ തകര്‍ത്തു,'രജിനികാന്ത് പറഞ്ഞു. അന്ന് ആ അനുഭവത്തോടെ താര പദവിയേക്കാള്‍ ആത്മീയതയാണ് വലുതെന്ന് മനസിലായെന്നും രജിനികാന്ത് കൂട്ടിച്ചേര്‍ത്തു.

Content Highlights: Rajinikanth reveals an incident that caused him to lose his pride